Mahabbat bar jerde mashaqatqa da oryn tabylady. Áýlet pen tobyrdyń kesirinen qanshama mahabbatqa toly taǵdyrlar qurban boldy. Bul – yqylym zamannan beri kele jatqan adamzattyq ahýal. Aǵylshynnyń uly dramatýrgi, aqyn Ýılám Shekspırdiń áıgili «ROMEO men DJÝLETTA» oqıǵasyn sýretteıtin tragedıasy elimizde alǵash ret qýyrshaqtar beınesinde 84 jyldyq tarıhy bar Almaty qalasynyń Memlekettik qýyrshaq teatrynda aǵymdaǵy jyldyń 24-25 qańtar kúnderi aralyǵynda kórermenge jol tartpaq. Qoıylym rejıseri – Dına Jumabaeva, sýretshisi – Iýlá Chernova, baletmeısteri – Anna Soı, qýyrshaqtardy jasaýshy sheber – Nıkolaı Proskýrın. Spektákl +18 jas ereksheligin quraıdy.

Atalmysh qoıylymdaǵy basty keıipkerler Romeo men Djýlettany sahnalaý úshin jas ónerpazdar, T.Júrgenov atyndaǵy Qazaq ulttyq óner akademıasynyń «Drama akteri» mamandyǵynyń 3 kýrs stýdentteri Amangeldiuly Ǵalym men Tórebaı Saltanat 50-ge jýyq jas talanttar baq synaǵan kastıngten arnaıy ótip, teatrdyń kórkemdik keńesi músheleri ári rejıser sheshimimen basty rólderge bekitildi.

Shyrǵalańǵa toly bul qoıylym adam boıyndaǵy qandy kek pen qyzǵanyshty, menmenshildik pen pendeshilik syndy qasıetterdi jeńgen móldir mahabbat týraly bolmaq. Romeo men Djýletta tek qana eski kózqarastar men qatynastarǵa qarsy shyǵyp qana qoımaı, olar jańa ómirge úlgi boldy. Olardyń arasyn qastyq bóle almady, olardy mahabbat qosty. Bul mahabbat sulýlyqqa súısinýden týyndady, adamnyń ulylyǵyna degen senimnen jáne onymen ómirde qýanyshty bólisýge tyrmysýynan týyndaǵan.  

Búginde kishkentaı búldirshinderden tys eresekterge arnalǵan keshki qoıylymdardy da sahnalap, jańa formatqa kóshken óner ordasy álemniń klasıkalyq týyndylaryn qýyrshaqtar beınesinde sóıletip, ulttyq qýyrshaq teatry ónerine jańa tynys syılaýda. Buǵan deıin sahna tórinde kórermenmen qaýyshyp, respýblıkalyq, halyqaralyq festıválderde synshylar tarapynan joǵary baǵaǵa ıe bolyp, qanjyǵasyn júldeli oryndarmen maılap júrgen «Ana júregi» (avt. E.Ionov, rej. A.Zaısev), «Ana-Jer Ana» (avt. Sh.Aıtmatov, rej. D.Jumabaeva), «Medeıa» (avt. Evrıpıd, rej. A.Salban) syndy eresekterge arnalǵan qoıylymdar qatary endi «Romeo men Djýletta» shyǵarmasymen tolyspaq.

Spektáklde bir artıs birneshe roldi sahnalap, kórermenge ózgeshe qyrlarynan tanylýǵa asyq. Máselen: aktrısa Saqtaǵanova Araı – ledı Kapýlettı, ledı Montekı, Rozalına; akter Qulnazarov Shohan – Lorenso pirádar, Tıbalt, sınor Kapýlettı, sınor Montekkı; aktrısa Baıyrbekova Araılym – kútýshi jáne akter Kamalov Maqsat – Merkýsıo, Eskal, Parıs, Baltazar, Benvolıoǵa jan berip, tańǵajaıyp qýyrshaq beınesinde ún bitirmek.

Memlekettik qýyrshaq teatrynyń ujymy Almaty qalasynynyń turǵyndary men qala qonaqtaryn ǵajaıypqa toly qýyrshaqtar álemine birge saıahat jasap, óner súıer jandardyń janyna rýhanı azyq syılap, kóńil perdesin ásem kúıge bóleý úshin atalmysh premerany birge tamashalýǵa shaqyrady!